التجاء بدرگاہِ ربّ کریم
طاہرہ زرتشت ناز ؔ
میرے آقا جو دن رات مصروف ہیں
دیں کی خدمت پہ ہر وقت معمور ہیں
فکر جن کو محمد کے پیغام کا
وقت جن کو نہیں کچھ بھی آرام کا
وقف تیرے لئے جن کے شام و سحر
لطف کی ہو سدا ان پہ تیری نظر
قوم و ملت کے غم سے ستائے ہوئے
بوجھ کاندھوں پہ سب کا اٹھائے ہوئے
منزلوں کی طرف ہیں رواں دیر سے
درد سینے میں سب کا چھپائے ہوئے
تیری الفت میں ہر دم وہ سر شار ہیں
تیرے دیں کے جفا کش وہ سالار ہیں
تُو تو شافی ہے قادر ہے مختار ہے
ہم تو کمزور ہیں سخت لاچار ہیں
ہم سے تسکین و راحت عطا ہو انہیں
تیری تائید و نصرت عطا ہو انہیں
منزلوں کی طرف آگے بڑھتے رہیں
دشمنِ دین جلتے ہیں جلتے رہیں
آنکھ پُرنم ہے دل ہے حزیں آج کل
تیرے در پر جھکی ہے جبیں آج کل
نازؔ کے ہاتھ اٹھے ہیں دعا کے لئے
لب پہ بھی التجاء ہے انہیں کے لئے
عمر و صحت کی دولت عطا کر انہیں
اپنی ہر ایک نعمت عطا کر انہیں
