غزل

  جنگل کی سیہ رات ہے یا زُلف گھنی ہے

کیا گل بدنی گل بدنی گل بدنی ہے

یہ لے ہے کہ کھلتی ہوئی غنچے کی کمانی

مہکا ہوا یہ تن ہے کہ یہ رات کی رانی

لہجے کی یہ رَو ہے کہ برستا ہوا پانی

لرزش میں یہ مژگاں ہے کہ پریوں کی کہانی

یہ سرخیِ لب ہے کہ عقیقِ یمنی ہے

کیا گل بدنی گل بدنی گل بدنی ہے

محراب ہے رُخسار کے پرتو سے زر افشاں

زلفوں میں شبِ تار ہے آنکھوں میں چراغاں

مہندی کی سجاوٹ کہ ہتھیلی پہ گلستاں

یا حلقہِ عشاق میں ہے چہرہِ تاباں

یا خاتمِ تابندہ پہ ہیرے کی کنی ہے

کیا گل بدنی گل بدنی گل بدنی ہے

عشوے ہیں کہ اک فوج کھڑی لوٹ رہی ہے

مکھڑا ہے کہ پربت پہ کرن پھوٹ رہی ہے

قامت ہے کہ برنائی سرو چمنی ہے

کیا گل بدنی گل بدنی گل بدنی ہے

تن میں ہے وہ خوشبو کہ ہیں گل سر بہ گریباں

چہرے پہ وہ سرخی ہے کہ حیران گلستاں

وہ چال میں ہے لوچ کہ شاخیں ہیں پشیماں

اور لعل گہر بار پہ وہ نغمہ ہے غلطاں

وہ نغمہ کہ اک ولولہ شعلہ زنی ہے

کیا گل بدنی گل بدنی گل بدنی ہے