تم وہی ہو لو تمہیں آج بتا دیتے ہیں

امتہ الرشید بدر

میں نے خود کو کبھی جب تنہا اکیلا پایا

کون ہے جس کو کہ نزدِ رگِ جاں ہی پایا

جس نے ہر درد میں ہر دکھ میں میرا ساتھ دیا

کون ہے آہ کو سُن کر وہ جو دوڑا آیا

تم وہی ہو لو تمہیں آج بتا دیتے ہیں

نور جس یاد سے تھا دل پہ اُترتا پایا

جس کے انفاس سے عالم کو مہکتا پایا

جس کی تخلیق پہ جب حسن پہ جب غور کیا

خوبروئیوں میں تھا اُس حُسن کا چرچا پایا

تم وہی ہو لو تمہیں آج بتا دیتے ہیں

گُلِ نوخیز نے جس سے تھا نکھرنا سیکھا

کون ہے جس سے کہ غنچوں نے چٹکنا سیکھا

جس کی خوشبووٴں سے مہکی ہیں فضائیں ہر سُو

جس کے ایماء سے ہی کلیوں نے مہکنا سیکھا

تم وہی ہو لو تمہیں آج بتا دیتے ہیں

چاند نے جس سے اُفق سے تھا ابھرنا سیکھا

نُور سے شب کو منّور بھی تھا کرنا سیکھا

حسن سے اپنے ہر آنکھ کو تسکین دے کر

عکس عالم میں اجاگر تیرا کرنا سیکھا

تم وہی ہو لو تمہیں آج بتا دیتے ہیں

جس سے خورشید کی کرنوں نے بکھرنا سیکھا

اپنی حدت سے نمو ہستی کی کرنا سیکھا

اور قوت بھرے نوروں کی بدولت پل پل

ہر گزرگاہِ جہاں فیض سے بھرنا سیکھا

تم وہی ہو لو تمہیں آج بتا دیتے ہیں

جس سے افلاک نے طاعت ہی تھا کرنا سیکھا

چاند تاروں کی قبا اوڑھ سنورنا سیکھا

جس کے اسرار عیاں کر کے جہاں والوں پر

عالم اسرار سے انوار سے بھرنا سیکھا

تم وہی ہو لو تمہیں آج بتا دیتےہیں

جس سے تھا ابر نے باراں نے برسنا سیکھا

اور سیراب جہاں فیض سے تھا کرنا سیکھا

یوں زمیں مردہ نے جی اُٹھنے کی انگڑائی لی

پھر خزاں نے تھا بہاروں میں بدلنا سیکھا

تم وہی ہو لو تمہیں آج بتا دیتے ہیں

حسن پر جس کے تھا ہر دل نے مچلنا سیکھا

ان حسیں جذبوں نے اُلفت میں تھا ڈھلنا سیکھا

عام الفت بھرے جذبات ہوئے دنیا میں

جس کی اُلفت سے ہی اُلفت نے پنپنا سیکھا

تم وہی ہو لو تمہیں آج بتا دیتے ہیں

کون جو سوچوں خیالوں پہ دل و روح پہ چھایا

جو میری جان میرا مان میرا دھن میری مایا

جب کبھی درد و غم ہم نے تھا بے تاب کیا

اُس کی شفقت کا ہی محسوس کیا سر پہ سایا

تم وہی ہو لو تمہیں آج بتا دیتے ہیں

جس کی حکمت کے بحر جاری ہیں دو عالم میں

نام ہے نامہٴ فطرت کے ہر اک کالم میں

جس کی طاعت کا ہی دم بھرتے ہیں سب کروّ بیاں

جو حسیں جذبوں کی صورت ہے دلِ عالم میں

تم وہی ہو لو تمہیں آج بتا دیتے ہیں

ہم نے ہر درد کی جس کو تھا دوا کرنا سیکھا

جس کی جانب غمِ ہستی سے تھا چلنا سیکھا

گالیاں کھائیں پٹے خوب ہی رسوا بھی ہوئے

تب اُسی در کو پناہ گاہ تھا کرنا سیکھا

تم وہی ہو لو تمہیں آج بتا دیتے ہیں

جس کا بندے کی حفاظت بھی تھا کرنا دیکھا

آہ مظلوم پر بے تاب اُترنا دیکھا

جب پریشان کیا حد سے عدو نے تو پھر

اُس کو پیشانی سے تھا جسکا پکڑنا دیکھا

تم وہی ہو لو تمہیں آج بتا دیتے ہیں