غزل ۔ ۔ ۔ اقرا عنبر
شاعرہ: اقرا عنبر
میرے دکھوں سے اس کو بھی واقف حال کر دیا
وقت نے آج دیکھیے کیسا کمال کر دیا
میرا سفر تھا دھوپ کا پھر بھی تھکی نہیں تھی میں
ایک نظر کے بوجھ نے مجھ کو نڈھال کر دیا
سارے جواب خامشی دیتی رہی تھی آج تک
بول اٹھے ہیں آئنے کس نے سوال کر دیا
مجھ کو بھی انتظار تھا پر یہ تمہارے خواب تو
نیند سے پہلے آ گئے سونا محال کر دیا
اس سے گلہ نہیں کیا اس سے شکایتیں نہ کیں
اس کو معاف کر دیا غم کو بحال کر دیا


